परिवहन विभाग कर्नाटक परिवहन विभागाचा पॅटर्न राज्यात राबवणार? परिवहनमंत्री प्रताप सरनाईक दोन दिवसांच्या कर्नाटक दौऱ्यावर
कर्नाटक राज्य मार्ग परिवहन महामंडळाच्या बस सेवेची माहिती घेणार
मुंबई- महाराष्ट्राचे धडाकेबाज परिवहन मंत्री प्रताप सरनाईक हे दोन दिवसांच्या कर्नाटक दौऱ्यावर आहेत. कर्नाटक राज्य मार्ग परिवहन महामंडळाच्या बस सेवेची माहिती ते घेणार आहेत. दर्जेदार सुविधा देण्यासोबतच आता येत्या काळात नाविन्यपूर्ण योजना आपल्या राज्यातील सर्वसामान्य जनतेच्या सेवेसाठी उपलब्ध होतील, यासाठी परिवहनमंत्री प्रताप सरनाईक यांनी पुढाकार घेतला असून सरनाईक हे दोन दिवसाच्या कर्नाटक दौऱ्यावर आहेत. या ठिकाणच्या सुविधांची माहिती घेऊन लवकरच कर्नाटक परिवहन विभागाचा पॅटर्न महाराष्ट्रात राबविण्यात येण्याची शक्यता आहे.
सरनाईकांसोबत महाराष्ट्र राज्य मार्ग परिवहन महामंडळाचे उपाध्यक्ष आणि व्यवस्थापकीय संचालक डॉ. माधव कुसेकर, श्री.नितीन मैद (महाव्यवस्थापक वाहतूक) आणि नंदकुमार कोलारकर (महाव्यवस्थापक यंत्र) हे अधिकारी देखील दौऱ्यात सहभागी होत आहेत. या दौऱ्याच्या दरम्यान कर्नाटक राज्याचे परिवहन मंत्री रामलिंगा रेड्डी यांच्यासोबतही मंत्री सरनाईक यांची बैठक होणार आहे. दोन्ही राज्यांच्या परिवहन सेवेसंदर्भात चर्चा होण्याची शक्यता आहे. पंतप्रधान नरेंद्र मोदी यांनी सर्व लोकप्रतिनिधींना मार्गदर्शन करताना सांगितले होते की, इतर राज्यात ज्या चांगल्या गोष्टी घडत आहेत, त्यांना भेट देऊन त्या आपल्या राज्यात कशा अंमलात आणता येतील याचा अभ्यास करावा.
जेणेकरून विविध ठिकाणच्या नाविन्यपूर्ण योजना आपल्या राज्यातील सर्वसामान्य जनतेच्या सेवेसाठी उपलब्ध होतील. याचाच एक भाग म्हणून कर्नाटक राज्य मार्ग परिवहन सेवेमार्फत चालवल्या जाणाऱ्या गरुडा, ऐरावत, अंबारी यासारख्या प्रतिष्ठित लांब पल्ल्याच्या सेवेची माहिती करून घेणे, तसेच त्यांच्या प्रादेशिक परिवहन व्यवस्थापनाचा अभ्यास करणे, त्याबरोबर त्यांनी कर्मचाऱ्यांसाठी राबवत असलेल्या प्रोत्साहन योजना जाणून घेण्यासाठी या दौऱ्याची आखणी केली आहे. इतर राज्यातील परिवहन सेवांचा अभ्यास करून त्यांच्या चांगल्या कल्पना आपल्या एसटी महामंडळामध्ये राबवणे शक्य आहे का, याची देखील चाचपणी या दौऱ्याच्या निमित्ताने केली जाणार आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
