मनसेच्या वतीने गुहागरमध्ये भव्य रक्तदान व आरोग्य तपासणी शिबिर उत्साहात संपन्न
महाराष्ट्र नवनिर्माण सेनेच्या १९ व्या वर्धापन दिनानिमित्त मनसे गुहागर तालुका संपर्क अध्यक्ष प्रमोद गांधी यांच्या सौजन्याने.
आबलोली (संदेश कदम) – महाराष्ट्र नवनिर्माण सेनेच्या १९ व्या वर्धापन दिनानिमित्त मनसे गुहागर तालुका संपर्क अध्यक्ष प्रमोद गांधी यांच्या सौजन्याने भवानी सभागृह, शृंगारतळी-पालपेणे रोड येथे भव्य रक्तदान शिबिर, आरोग्य शिबिर तसेच मोफत डोळे तपासणी व चष्मा वाटप शिबिराचे आयोजन करण्यात आले.
या शिबिराचे उद्घाटन मनसे गुहागर तालुका संपर्क अध्यक्ष प्रमोद गांधी यांच्या हस्ते करण्यात आले. कार्यक्रमाला राष्ट्रवादी काँग्रेसचे तालुका अध्यक्ष सुरेश सावंत, सुप्रसिद्ध डॉक्टर राजेंद्र पवार, जानवळे ग्रामपंचायत सरपंच जान्हवी विखारे, उपसरपंच वैभवी जानवळकर, मनसे उपजिल्हाध्यक्ष विनोद जानवळकर, तालुकाध्यक्ष सुनील हळदणकर, उपतालुकाध्यक्ष जितेंद्र साळवी, शेतकरी संघटना गुहागर तालुका अध्यक्ष प्रसाद कुष्टे, अमित खांडेकर, सह संपर्क अध्यक्ष सुरेंद्र निकम, मुंढर शाखा अध्यक्ष सुजित गांधी, प्रशांत साटले तसेच अपरांत हॉस्पिटल चिपळूण, वालावलकर हॉस्पिटल डेरवण व रेड क्रॉस रत्नागिरी येथील डॉक्टर्स व कर्मचारी उपस्थित होते.
मनसेच्या वतीने सतत जनहिताचे उपक्रम राबवले जात असून, त्याचाच एक भाग म्हणून या शिबिराचे आयोजन करण्यात आले. अपरांत मल्टीस्पेशालिटी हॉस्पिटल चिपळूण यांच्या सहकार्याने मोफत आरोग्य तपासणी शिबिर घेण्यात आले. यात रक्तगट तपासणी, मधुमेह, रक्तदाब, ईसीजी, कर्करोग तपासणी आदी सेवांचा समावेश होता. तज्ञ डॉक्टरांनी आरोग्य तपासणी करून आहार व औषधांबाबत मार्गदर्शन केले. मोफत डोळे तपासणी व चष्मा वाटप देखील करण्यात आले.
या शिबिरात तालुक्यातील विविध समाजघटकांतील रक्तदात्यांनी सहभाग घेतला. त्यामुळे सामाजिक एकता आणि लोकसेवेचा एक नवा आदर्श निर्माण झाला.
कार्यक्रमाला गुहागर तालुक्याचे तहसीलदार परीक्षित पाटील, तालुका आरोग्य अधिकारी घनश्याम जांगिड, तसेच विविध पक्षांचे प्रमुख पदाधिकारी उपस्थित होते. तहसीलदार परीक्षित पाटील यांनी मनसेच्या या सामाजिक उपक्रमाचे कौतुक केले. या शिबिराच्या यशस्वी आयोजनासाठी मनसे तालुका संपर्क अध्यक्ष प्रमोद गांधी, उपजिल्हाध्यक्ष विनोद जानवळकर, तालुकाध्यक्ष सुनील हळदणकर आणि त्यांच्या टीमने विशेष मेहनत घेतली.
—
Author: Team Ratnagiri Vartahar
Official Ratnagiri vartahar Media creators & RV News YouTube Channel.
