पोलीस अधिकाऱ्यास ओरडून बोलल्याने आयपीसीच्या कलम ३५३ अन्वये गुन्हा दाखल होऊ शकत नाही – मुंबई उच्च न्यायालयाचा निकाल
अधिवक्ता नारायण रोकडे यांनी मांडली अमर शिवाजीराव चव्हाण यांची बाजू
मुंबई उच्च न्यायालयाने एका महत्त्वपूर्ण निर्णयात स्पष्ट केले आहे की, केवळ पोलीस अधिकाऱ्यासमोर ओरडून बोलल्याने भारतीय दंड संहितेच्या (IPC) कलम ३५३ अन्वये गुन्हा दाखल करता येणार नाही. हा निकाल अमर शिवाजीराव चव्हाण यांच्या विरोधात दाखल केलेल्या एफआयआरच्या संदर्भात आला आहे.
प्रकरणाचा तपशील:
अमर चव्हाण यांच्यावर पोलीस अधिकाऱ्यासमोर ओरडल्यामुळे IPC च्या कलम १८६ व ३५३ अन्वये गुन्हा दाखल करण्यात आला होता. त्यांनी हा एफआयआर रद्द करण्यासाठी मुंबई उच्च न्यायालयात याचिका दाखल केली होती.
कोल्हापूर स्थानिक गुन्हे अन्वेषण विभागाच्या पोलिसांना मिळालेल्या गुप्त माहितीच्या आधारे मुरगूड पोलीस ठाणे हद्दीत अर्जुननगर अर्जुनी (ता. कागल, जि. कोल्हापूर) येथे धनश्री कला, क्रिडा, सांस्कृतिक व मनोरंजन मंडळाच्या ठिकाणी छापा टाकण्यात आला. पोलिसांना तेथे बेकायदेशीररित्या पैसे लावून जुगार खेळवला जात असल्याची खात्री झाल्यावर कारवाई करण्यात आली.
यावेळी, सदर व्यवसायाचा मूळ मालक अमर शिवाजीराव चव्हाण यांनी पोलिसांशी वाद घातला. त्यांनी पोलीस महासंचालकांकडून परवाना घेतल्याचा दावा केला आणि पोलिसांनी प्रवेश करू नये असा न्यायालयाचा आदेश असल्याचे सांगितले. तसेच, पोलिसांविरोधात तक्रार करण्याची धमकी दिली. या घटनेनंतर IPC च्या कलम १८६ आणि ३५३ अन्वये गुन्हा दाखल करण्यात आला.
न्यायालयाचा निर्णय:
मुंबई उच्च न्यायालयाच्या न्यायमूर्ती सारंग व कोतवाल आणि स. म. मोडक यांच्या खंडपीठाने हा निकाल दिला. न्यायालयाने निरीक्षण नोंदवले की, FIR आणि आरोपपत्रातील मजकुराचा विचार करता, केवळ ओरडल्याने IPC च्या कलम ३५३ अंतर्गत गुन्हा सिद्ध होणार नाही. त्यामुळे याचिकाकर्त्यावरील आयपीसीच्या कलम ३५३ अंतर्गत दाखल एफआयआर बाबत खालील न्यायालयात सुरू असलेल्या सुनावणीस स्थगिती देण्यात आली आहे.
CRIMINAL WRIT PETITION NO.6114 OF 2024
या निर्णयामुळे कायद्याच्या अंमलबजावणी प्रक्रियेत महत्त्वाचा संदेश गेला असून, केवळ वाद किंवा ओरडण्याने IPC ३५३ अन्वये गुन्हा ठरू शकत नाही, हे स्पष्ट झाले आहे.
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
