१० वर्षांनी बेंगळुरूने जिंकला मुंबईचा किल्ला, कृणाल पंड्या ठरला विजयाचा शिल्पकार
मुंबई (गुरुदत्त वाकदेकर) : एक अतिशय रोमांचक सामना, जो आरसीबीसाठी आनंदाने संपला. कृणाल पंड्याने शेवटच्या षटकात मुंबईला रोखले आणि तीन विकेट्स घेतल्या. आयपीएल २०२५ च्या वानखेडे स्टेडियमवर झालेल्या २० व्या सामन्यात रॉयल चॅलेंजर्स बंगळुरूने मुंबई इंडियन्सचा १२ धावांनी पराभव केला. आरसीबीने १० वर्षांनंतर मुंबईला घरच्या मैदानावर हरवले.
प्रथम फलंदाजी करताना आरसीबीने २० षटकांत ५ गडी गमावून २२१ धावा केल्या. प्रत्युत्तरात, मुंबई इंडियन्सने २० षटकांत ९ गडी गमावून २०९ धावा केल्या.
२२२ धावांच्या लक्ष्याचा पाठलाग करताना रोहित शर्मा (१७) आणि रायन रिकेलटन (१७) यांनी मुंबईला जलद सुरुवात देण्याचा प्रयत्न केला. पण यश दयालने रोहित शर्माला बाद करून मुंबईची सुरुवात खराब केली. हेझलवूडने रायन रिकेलटनला बाद केले.
विल जॅक्स (२२) आणि सूर्यकुमार यादव (२८) यांनी डाव सावरण्याचा प्रयत्न केला पण दोघेही धावगती वाढविण्यात अपयशी ठरले. कृणाल पंड्याने जॅकला विराट कोहलीकरवी झेलबाद करून आरसीबीला तिसरे यश मिळवून दिले. सूर्याची बॅटही शांत राहिली आणि यश दयालच्या चेंडूवर लिव्हिंगस्टोनला झेल देऊन तो तंबूमध्ये परतला.
त्यानंतर, तिलक वर्मा (५६) आणि हार्दिक पंड्या (४२) यांनी स्फोटक खेळी करत सामन्याचा मार्ग बदलला आणि मुंबई इंडियन्सला पुनरागमन करण्यास मदत केली. दोघांनीही फक्त ३४ चेंडूत ८९ धावांची भागीदारी केली. त्यानंतर भुवीने तिलकला बाद करून मोठी भागीदारी भेदली. तिलकने २९ चेंडूत चार चौकार आणि चार षटकारांसह ५६ धावा केल्या. पुढच्याच षटकात, हेझलवूडने हार्दिक पंड्याला बाद करून मुंबईचा जवळजवळ शेवट केला.
मुंबई इंडियन्सला शेवटच्या षटकात १९ धावांची आवश्यकता होती. कृणाल पांड्याने पहिल्या दोन चेंडूंवर मिचेल सँटनर (८) आणि दीपक चहर (०) यांना बाद केले. त्यानंतर त्याने पाचव्या चेंडूवर नमन धीरला (११) यश दयालकडून झेलबाद करून आरसीबीचा विजय निश्चित केला. कृणाल पंड्याने सर्वाधिक चार विकेट्स घेतल्या. जोश हेझलवूड आणि यश दयाल यांनी प्रत्येकी दोन विकेट घेतल्या. भुवीने एक विकेट घेतली.
त्याआधी, विराट कोहली (६७) आणि रजत पाटीदार (६४) यांनी अर्धशतके ठोकली आणि आरसीबीला मुंबई इंडियन्सविरुद्ध २२२ धावांचे लक्ष्य देण्यात मदत केली. आरसीबीने निर्धारित २० षटकांत ५ गडी गमावून २२१ धावा केल्या.
प्रथम फलंदाजी करण्यासाठी आलेल्या आरसीबीची सुरुवात खूपच खराब झाली. फिल साल्ट (४) याला ट्रेंट बोल्टने त्रिफळाचीत केला. त्यानंतर विराट कोहली आणि देवदत्त पडिक्कल (३७) यांनी दुसऱ्या विकेटसाठी ९१ धावांची भागीदारी केली. दोघांनीही पॉवरप्लेमध्ये आरसीबीला ७२ धावांपर्यंत पोहोचवले. कोहलीने त्याचे अर्धशतक पूर्ण केले आणि त्याच षटकात पुथूरने पडिक्कलला बाद केले.
कोहली आणि रजत पाटीदार (६४) यांनी तिसऱ्या विकेटसाठी ४७ धावांची भागीदारी केली. हार्दिक पांड्याने कोहलीचा डाव नमन धीरकडे झेल देऊन संपवला. कोहलीने ४२ चेंडूत ८ चौकार आणि दोन षटकारांच्या मदतीने ६७ धावा केल्या. त्याच षटकात पांड्याने लियाम लिव्हिंगस्टोनला बाद केले.
या काळात रजत पाटीदारने आपला आक्रमक खेळ सुरूच ठेवला. त्याला जितेश शर्मा (४०*) सारखा एक चांगला जोडीदार मिळाला. दोघांनीही पाचव्या विकेटसाठी ६९ धावांची भागीदारी केली. बोल्टनने पाटीदारला बाद केले. पाटीदारने ३२ चेंडूत पाच चौकार आणि चार षटकारांच्या मदतीने ६४ धावा केल्या. जितेश शर्माने १९ चेंडूंत दोन चौकार आणि चार षटकारांच्या मदतीने नाबाद ४० धावा केल्या. मुंबई इंडियन्सकडून हार्दिक पंड्याने सर्वाधिक दोन विकेट्स घेतल्या. विघ्नेश पुथूर, ट्रेंट बोल्ट आणि जसप्रीत बुमराह यांनी प्रत्येकी एक विकेट घेतली.
#IPL2025 #RCBvsMI #MumbaiIndians #RoyalChallengersBangalore #VankhedeStadium #KrunalPandya #ViratKohli #TilakVarma #HardikPandya #RCBVictory #MIvsRCB #IPLMarathi #MarathiCricketNews #क्रिकेटबातम्या #आयपीएल२०२५ #मुंबईविरुद्धबंगळुरू #वानखेडे
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
