गुजरात टायटन्सने आयपीएलमधील त्यांचे सर्वात मोठे लक्ष्य गाठले; दिल्लीला हरवून संघ अव्वल स्थानावर
मुंबई (गुरुदत्त वाकदेकर) : जोस बटलर आणि शेरफेन रदरफोर्ड यांच्यातील शानदार शतकी भागीदारीच्या जोरावर गुजरात टायटन्सने दिल्ली कॅपिटल्सचा सात विकेट्सने पराभव केला. प्रथम फलंदाजी करताना दिल्लीने २० षटकांत आठ गडी गमावून २०३ धावा केल्या. प्रत्युत्तरादाखल, बटलरने ५४ चेंडूत ११ चौकार आणि चार षटकारांसह नाबाद ९७ धावा फटकावल्या आणि गुजरातने १९.२ षटकांत ३ बाद २०४ धावा करून सामना जिंकला.
अशाप्रकारे गुजरातने आयपीएलमधील आपले सर्वात मोठे लक्ष्य गाठले. याआधी संघाने कधीही २००+ धावांचे लक्ष्य गाठले नव्हते. या सामन्यापूर्वी दिल्लीने चार वेळा २०० पेक्षा जास्त धावांचे लक्ष्य गाठले होते, परंतु संघाला यश मिळाले नाही. दिल्ली कॅपिटल्सविरुद्ध कोणत्याही संघाने ठेवलेले हे सर्वोच्च लक्ष्य आहे.
या विजयासह, गुजरात टायटन्सने दिल्ली कॅपिटल्सला मागे टाकत गुणतक्त्यामध्ये अव्वल स्थान पटकावले आहे. सात सामन्यांत पाच विजय आणि दोन पराभवांसह गुजरात १० गुणांसह अव्वल स्थानावर आहे. दुसरीकडे, दिल्ली संघ सात सामन्यांत पाच विजय आणि दोन पराभवांसह १० गुणांसह दुसऱ्या स्थानावर आहे. गुजरात आणि दिल्लीचे गुण समान असले तरी, निव्वळ धावगतीच्या बाबतीत गुजरात दिल्लीपेक्षा सरस आहे.
बटलर आणि रदरफोर्ड यांनी ११९ धावांची भागीदारी केली, जी गुजरात टायटन्ससाठी आयपीएलमधील तिसऱ्या विकेटसाठीची सर्वोच्च भागीदारी होती. बटलर आणि रदरफोर्ड यांनी या बाबतीत शुभमन गिल आणि साई सुदर्शन यांचा विक्रम मागे टाकला, ज्यांनी संघासाठी तिसऱ्या विकेटसाठी ९० धावांची भागीदारी केली होती.
लक्ष्याचा पाठलाग करताना, गुजरातची सुरुवात चांगली झाली नाही कारण त्यांनी कर्णधार शुभमन गिलला लवकर गमावले. सात धावा काढून गिल धावबाद झाला. यानंतर, साई सुदर्शन आणि बटलर यांनी दुसऱ्या विकेटसाठी ६० धावांची भागीदारी केली आणि संघाची सूत्रे हाती घेतली. सुदर्शन चांगली फलंदाजी करत होता पण २१ चेंडूत पाच चौकार आणि एका षटकाराच्या मदतीने ३६ धावा काढल्यानंतर तो बाद झाला. त्यानंतर बटलर आणि रदरफोर्ड यांनी शानदार फलंदाजी केली आणि दिल्लीच्या गोलंदाजांना खूप त्रास दिला. बटलर आणि रदरफोर्ड यांनी तिसऱ्या विकेटसाठी शतकी भागीदारी केली.
या सामन्यात रदरफोर्ड एक प्रभावशाली खेळाडू म्हणून आला आणि अखेर मुकेश कुमारने त्याला बाद केले. रुदरफोर्डने ३४ चेंडूत एक चौकार आणि तीन षटकारांच्या मदतीने ४३ धावा केल्या. रदरफोर्ड बाद झाल्यानंतर सामना रोमांचक परिस्थितीत पोहोचला. शेवटच्या षटकात गुजरातला जिंकण्यासाठी १० धावांची आवश्यकता होती आणि तेवतिया खेळपट्टीवर होता. मिचेल स्टार्कच्या पहिल्या चेंडूवर तेवतियाने षटकार मारला आणि दुसऱ्या चेंडूवर चौकार मारून सामना संपवला. तेवतियाने ३ चेंडूत ११ धावा काढत नाबाद राहिला. दिल्लीकडून कुलदीप यादव आणि मुकेश कुमार यांनी प्रत्येकी एक विकेट घेतली.
तत्पूर्वी, या सामन्यात गुजरातने नाणेफेक जिंकून प्रथम गोलंदाजी करण्याचा निर्णय घेतला. दिल्लीने सामन्यासाठी जॅक फ्रेझर मॅकगर्कचा समावेश केला नाही आणि करुण नायर अभिषेक पोरेलसह डावाची सुरुवात करण्यासाठी आला. अभिषेकने संघाला चांगली सुरुवात दिली, पण अर्शद खानने पोरेलला बाद केले. नऊ चेंडूत १८ धावा काढून पोरेल तंबूमध्ये परतला. दिल्लीकडून कर्णधार अक्षर पटेलने सर्वाधिक ३९ धावा केल्या. तथापि, शेवटी, आशुतोष शर्माने १९ चेंडूत दोन चौकार आणि तीन षटकारांच्या मदतीने ३७ धावा केल्या, ज्यामुळे संघ २०० धावांचा टप्पा ओलांडण्यात यशस्वी झाला.
नाणेफेक गमावून प्रथम फलंदाजी केल्यानंतर, दिल्लीने पोरेल आणि केएल राहुलचे बळी लवकर गमावले. केएल राहुल १० वर्षांनी आयपीएलमध्ये तिसऱ्या क्रमांकावर फलंदाजीसाठी आला पण २८ धावा करून बाद झाला. यानंतर, करुण नायरही १८ चेंडूत ३१ धावा काढून तंबूमध्ये परतला. त्यानंतर कर्णधार अक्षरने ट्रिस्टन स्टब्ससोबत चौथ्या विकेटसाठी अर्धशतकी भागीदारी केली, परंतु सिराजने स्टब्सला बाद करून ही भागीदारी मोडली. २१ चेंडूत ३१ धावा काढून स्टब्स तंबूमध्ये परतला. मिचेल स्टार्क दोन आणि कुलदीप यादव चार धावांवर नाबाद राहिले. गुजरातकडून प्रसिद्ध कृष्णाने शानदार गोलंदाजी केली आणि चार षटकांत ४१ धावा देत चार विकेट्स घेतल्या. प्रसिद्ध सध्या पर्पल कॅपच्या शर्यतीत आघाडीवर आहे.
Author: Team Ratnagiri Vartahar
Official Ratnagiri vartahar Media creators & RV News YouTube Channel.
