निवडणूक आयोगाचा मोठा निर्णय: सीसीटीव्ही फुटेज आता ४५ दिवसांत नष्ट होणार

निवडणूक आयोगाचा मोठा निर्णय: सीसीटीव्ही फुटेज आता ४५ दिवसांत नष्ट होणार

नवी दिल्ली: केंद्रीय निवडणूक आयोगाने (Election Commission of India) निवडणुकीतील सीसीटीव्ही फुटेज आणि छायाचित्रे साठवण्याबाबत महत्त्वपूर्ण बदल केले आहेत. आता निवडणूक प्रक्रियेतील सीसीटीव्ही फुटेज केवळ ४५ दिवसांपर्यंतच साठवले जाईल. म्हणजेच, निवडणुकीचा निकाल जाहीर झाल्यानंतर पुढील ४५ दिवसांनी हे फुटेज नष्ट केले जाईल, जर या कालावधीत निवडणूक आयोगाकडे कोणतीही याचिका दाखल झाली नाही.

निर्णयाचे कारण आणि पूर्वीचे नियम

यापूर्वी, वेगवेगळ्या प्रकारच्या रेकॉर्डिंग ३ महिने ते १ वर्षापर्यंत सुरक्षित ठेवल्या जात होत्या. मात्र, अलीकडच्या काळात सोशल मीडियावर आयोगाच्या रेकॉर्डिंगच्या माहितीच्या आधारे अनेक गैरसमज पसरवले जात होते आणि काही चुकीचे संदर्भ देत व्हिडिओ व्हायरल केले जात होते. याच पार्श्वभूमीवर आयोगाने हा निर्णय घेतल्याचे सांगितले जात आहे, जेणेकरून अशा गैरसमजांना आळा घालता येईल.

काँग्रेसच्या मागण्या आणि त्यांचा संदर्भ

गेल्या वर्षी झालेल्या लोकसभा निवडणूक आणि महाराष्ट्रातील विधानसभा निवडणुकीच्या निकालांवर काँग्रेसने (Congress) संशय व्यक्त करत प्रश्न उपस्थित केले होते. काँग्रेसचे खासदार आणि लोकसभेचे विरोधी पक्षनेते राहुल गांधी (Rahul Gandhi) यांनी महाराष्ट्र विधानसभेच्या निवडणुकीवर गंभीर आक्षेप घेतले होते. विशेषतः, मतदानाची वेळ संपल्यानंतर मतदानाचा वाढलेल्या टक्क्यांवर त्यांनी प्रमुख आक्षेप घेतला होता. इतकेच नव्हे, तर मतदानाचे व्हिडिओ फुटेज उपलब्ध करून दिले जावेत, अशी मागणीही त्यांनी केली होती.

नवीन नियमांची अंमलबजावणी

नवीन नियमांनुसार, निवडणूक निकाल जाहीर झाल्यानंतर ४५ दिवसांच्या आत सीसीटीव्ही डेटा निवडणूक आयोगाकडे सुरक्षित राहील. जर या वेळेपर्यंत निवडणूक आयोगाकडे कोणतीही याचिका पोहोचली नाही, तर तो डेटा नष्ट केला जाऊ शकतो. निवडणूक आयोगाने या संदर्भात सर्व राज्य निवडणूक आयोगांना आवश्यक सूचना दिल्या आहेत.

एका इंग्रजी वृत्तपत्राने दिलेल्या वृत्तानुसार, निवडणूक प्रक्रियेचे व्हिडिओग्राफी आणि छायाचित्रण कायद्यानुसार अनिवार्य नसले तरी, ते “अंतर्गत व्यवस्थापन साधन” (internal management tool) म्हणून वापरले जाते. निवडणूक आयोगाने घेतलेला हा निर्णय निवडणुकीच्या पारदर्शकतेवर आणि डेटा व्यवस्थापनावर कसा परिणाम करतो हे पाहणे महत्त्वा

चे ठरेल.

Author: Team Ratnagiri Vartahar

Official Ratnagiri vartahar Media creators & RV News YouTube Channel.