छत्रपती संभाजी महाराजांचे स्मारक जागतिक दर्जाचे असावे: पालकमंत्री डॉ. उदय सामंत
होलोग्राफी आणि आधुनिक तंत्रज्ञानाचा वापर करण्याची सूचना
रत्नागिरी | Ratnagiri
धर्मवीर छत्रपती संभाजी महाराजांचे स्मारक हे जगभरातील इतिहासकार, अभ्यासक आणि संशोधकांना आकर्षित करणारे, प्रेरणा देणारे आणि ऐतिहासिक माहिती देणारे असावे, असे मत पालकमंत्री डॉ. उदय सामंत यांनी व्यक्त केले. हे स्मारक भव्य-दिव्य आणि देखणे असावे, यासाठी आराखडा तयार करताना होलोग्राफीचाही वापर करावा, अशी सूचना डॉ. सामंत यांनी केली.
जिल्हाधिकारी कार्यालयातील सभागृहात धर्मवीर छत्रपती संभाजी महाराज स्मारकाबाबत नुकतेच एक सादरीकरण करण्यात आले. यावेळी निवासी उपजिल्हाधिकारी चंद्रकांत सूर्यवंशी, प्रांताधिकारी जीवन देसाई, कार्यकारी अभियंता अमोल ओटवणेकर, जलसंपदा विभागाचे कार्यकारी अभियंता गणेश सलगर, सुभाष सरदेसाई, राजेंद्र महाडिक, बंड्या साळवी, बाबू म्हाप आदी उपस्थित होते.
पालकमंत्री डॉ. सामंत यांनी यावेळी बोलताना सांगितले की, युनेस्कोने छत्रपती शिवाजी महाराजांच्या बारा किल्ल्यांना जागतिक वारसा स्थळांमध्ये मानांकन दिले आहे. या किल्ल्यांच्या प्रतिकृती स्मारकातील संग्रहालयामध्ये असाव्यात. तसेच, धर्मवीर छत्रपती संभाजी महाराजांच्या जीवनावर आधारित एक संग्रहालयही तयार करावे. या परिसरातील मंदिरांचेही संवर्धन करण्यावर त्यांनी भर दिला. अत्यंत कल्पकतेने आणि आधुनिक तंत्रज्ञानाचा वापर करून हे स्मारक उभारण्यासाठी, त्याचा आराखडादेखील तितकाच प्रभावी असावा, असे डॉ. सामंत म्हणाले. राज्य शासनातर्फे आवश्यक तो निधी दिला जाईल आणि स्मारकामध्ये कोणतीही कमतरता राहणार नाही, असा सर्वसमावेशक आराखडा तातडीने तयार करण्याचे निर्देश त्यांनी दिले.
: Dr. Uday Samant: Chhatrapati Sambhaji Maharaj Memorial to be World-Class | डॉ. उदय सामंत: छत्रपती संभाजी महाराजांचे स्मारक जागतिक दर्जाचे असावे
: Guardian Minister Suggests Holography and Modern Technology for Grand Design | पालकमंत्रींकडून भव्य आराखड्यासाठी होलोग्राफी व आधुनिक तंत्रज्ञानाचा वापर करण्याची सूचना
Hashtags:
#ChhatrapatiSambhajiMaharaj #UdaySamant #Memorial #Rajnagiri #History #Maharashtra #Tourism #Heritage #Holography #Museum #छत्रपतीसंभाजीमहाराज #उदयसामंत #स्मारक #रत्नागिरी #इतिहास #महाराष्ट्र #पर्यटन #वारसा #होलोग्राफी #
संग्रहालय
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
