📰 सिंधुरत्न समृद्ध योजना : रत्नागिरी-सिंधुदुर्ग जिल्ह्याचा आर्थिक विकास वेगाने!
जिल्हाधिकारी देवेंद्र सिंह यांच्या अध्यक्षतेखाली बैठकीत योजना मूल्यांकन; रोजगार निर्मिती, पर्यटन, शेती, मत्स्यव्यवसायास चालना
रत्नागिरी :
रत्नागिरी व सिंधुदुर्ग जिल्ह्याच्या आर्थिक विकासासाठी गेल्या तीन वर्षांपासून राबविण्यात येणाऱ्या **”सिंधुरत्न समृद्ध योजना”**चा आढावा जिल्हाधिकारी कार्यालय सभागृहात घेण्यात आला. या बैठकीस यशवंतराव चव्हाण विकास प्रशासन प्रबोधिनी (यशदा), पुणे यांच्या संशोधन सहयोग व सल्लासेवा केंद्राचे अधिकारी सहभागी झाले होते.
बैठकीचे अध्यक्ष जिल्हाधिकारी एम. देवेंद्र सिंह होते. यावेळी यशदा चे संचालक सुमेध गुर्जर, समन्वयक अधिकारी प्रज्ञा दासरवार, संशोधन अधिकारी अजित करपे तसेच कार्यकारी समिती सदस्य अजित यशवंतराव (दूरदृश्य प्रणालीव्दारे) उपस्थित होते.
जिल्हाधिकाऱ्यांनी कृषी, पशुसंवर्धन, मत्स्यव्यवसाय, पर्यटन, वने, महिला व बालविकास या विभागांतर्गत राबविण्यात आलेल्या योजनांची सविस्तर माहिती दिली. या योजनेतून दरडोई उत्पन्नात वाढ व स्थानिक रोजगार निर्मिती झाल्याचे त्यांनी स्पष्ट केले. तसेच उर्वरित निधी मिळाल्यास उद्दिष्टे अधिक व्यापक प्रमाणात साध्य होऊ शकतील असे सांगितले.
📌 योजनेतून झालेले उपक्रम:
पर्यटकांसाठी टूरिस्ट बस व हाऊसबोट
मत्स्यव्यवसायिकांना कुलिंग व्हॅन, बिगर यांत्रिकी नौका
शेतकऱ्यांना मोफत भात, नागली, भाजीपाला बियाणे
आंबा बागायतदारांना बोलेरो गाड्या व फळमाशी सापळे
मालगुंड येथे प्राणी संग्रहालय हा नाविन्यपूर्ण उपक्रम
सिंह यांनी योजनेमुळे शेती व पूरक व्यवसायाला चालना मिळत असल्याचे नमूद केले. तर यशवंतराव यांनी योजना पुढे सुरू ठेवण्याची गरज व्यक्त केली. योजनेचा दुग्धव्यवसायालाही समावेश व्हावा, अशी सूचनाही त्यांनी केली.
यशदा संचालक गुर्जर यांनी मुल्यमापनाचा उद्देश केवळ खर्चाचा ताळमेळ नव्हे तर सुसूत्रता, योजनांची सांगड आणि पर्यावरणक्षम शाश्वत विकास असल्याचे सांगितले. यासाठी लाभार्थ्यांसोबत विभागनिहाय ४ दिवसांची कार्यशाळा घेण्याची माहितीही त्यांनी दिली.
बैठकीचा समारोप जिल्हा नियोजन अधिकाऱ्यांनी आभारप्रदर्शनाने केला.
—
🔖 हॅशटॅग्स:
#रत्नागिरी #सिंधुदुर्ग #सिंधुरत्नसमृद्धयोजना #आर्थिकविकास #रोजगारनिर्मिती #यशदा #देवेंद्रसिंह
—
ही बात
Author: RV. Reporters
Guhagar Office .. * Ratnagiri vartahar Digital News * ..
