महाराष्ट्र दिनानिमित्त पालकमंत्र्यांची राष्ट्रध्वजाला मानवंदना; रत्नागिरीच्या विकासासाठी नागरिकांचे सहकार्य आवश्यक – डॉ. उदय सामंत
शिवसृष्टी, मल्टीमीडिया शो, बंधारा व 30 हजार कोटींचे औद्योगिक प्रकल्प उभारणीच्या वाटेवर; २० हजार युवकांना रोजगाराची संधी
रत्नागिरी | महाराष्ट्र राज्याच्या ६६व्या स्थापना दिनानिमित्त पालकमंत्री डॉ. उदय सामंत यांनी पोलीस परेड ग्राऊंडवर राष्ट्रध्वज फडकावून मानवंदना दिली. जिल्ह्याच्या सर्वांगीण विकासासाठी रत्नागिरीकरांनी सहकार्य करण्याचा संकल्प या दिवशी घ्यावा, असे आवाहन त्यांनी केले.
रत्नागिरीत पांढरा समुद्र ते मिऱ्या पर्यंत साडेतीनशे कोटींचा बंधारा उभारण्यात येणार असून, तो देशविदेशातील पर्यटकांना आकर्षित करणारे महत्त्वाचे पर्यटनस्थळ ठरणार आहे. शिवाय रत्नागिरीत साकार झालेल्या शिवसृष्टीला आतापर्यंत २० हजारांहून अधिक पर्यटकांनी भेट दिली आहे, तर ३डी मल्टीमीडिया शोसाठी ५ हजारांहून अधिक पर्यटकांनी हजेरी लावली आहे. यामध्ये परदेशी पाहुण्यांचाही समावेश आहे.
डॉ. सामंत यांनी मराठी भाषेला अभिजात दर्जा मिळाल्याबद्दल पंतप्रधान नरेंद्र मोदी यांचे आभार मानले. मालगुंड गावाला ‘पुस्तकांचे गाव’ म्हणून घोषित करण्याच्या निर्णयाची अंमलबजावणी झाल्याचेही त्यांनी सांगितले.
औद्योगिक क्षेत्रात रत्नागिरीची भरारी सुरू असून, कोका कोला प्रकल्प दोन महिन्यांत सुरू होणार आहे. याशिवाय व्हीआयटी सेमीकंडक्टर, धीरुभाई अंबानी डिफेन्स क्लस्टर व निबे डिफेन्स क्लस्टरसह ३० हजार कोटींच्या प्रकल्पांतून २० हजार युवकांना रोजगार मिळणार आहे.
शासकीय कार्यक्रमात पोलीस, महिला पथक, अग्निशमन वाहनांचे संचलन झाले. परेडचे नेतृत्व परिविक्षाधीन आयपीएस अधिकारी निखील पाटील यांनी केले.
उल्लेखनीय कामगिरीसाठी पोलीस निरीक्षक नितीन ढेरे यांच्यासह इतर अधिकाऱ्यांना सन्मानचिन्ह आणि प्रशस्तिपत्र देऊन गौरवण्यात आले. तसेच वसुंधरा दिनानिमित्त आयोजित स्पर्धेत विजेते ठरलेल्या राधिका दुसार व आराध्या टाकळे यांचाही सत्कार झाला.
सिंधुरत्न समृद्ध योजनेंतर्गत आंबा वाहतुकीसाठी नव्याने सादर झालेल्या कुलिंग व्हॅनचे लोकार्पण पालकमंत्र्यांच्या हस्ते झाले. त्यांनी व्हॅन चालवून पाहणीही केली.
हॅशटॅग्स:
#महाराष्ट्रदिवस #रत्नागिरीविकास #उदयसामंत #शिवसृष्टी #मल्टीमीडियाशो #औद्योगिकविकास #पुस्तकांचेगाव #रत्नागिरीबातम्या
फोटो :
- राष्ट्रध्वजाला मानवंदना देताना पालकमंत्री डॉ. उदय सामंत
Author: Sujit Surve.
⭕ सुजित सुर्वे -प्रतिनिधी - रत्नागिरी वार्ताहर डिजिटल बातमी पत्र ⭕ ⭕ पडवे - गुहागर. 415613 ⭕
