सनरायझर्सविरुद्धच्या पराभवानंतर आरसीबी घसरली तिसऱ्या स्थानावर
मुंबई (गुरुदत्त वाकदेकर) : सनरायझर्स हैदराबादने आरसीबीचा ४२ धावांनी पराभव करून मोठा विजय मिळवला. प्रथम फलंदाजी करताना सनरायझर्सने इशान किशनच्या दमदार खेळीच्या जोरावर २० षटकांत सहा गडी गमावून २३१ धावा केल्या. प्रत्युत्तरादाखल, फिल साॅल्ट आणि विराट कोहली यांनी संघाला चांगली सुरुवात दिली, परंतु आरसीबी १९.५ षटकांत १८९ धावांवर सर्वबाद झाला. आरसीबीने आधीच प्लेऑफसाठी पात्रता मिळवली आहे पण या पराभवामुळे अव्वल दोन संघांमध्ये स्थान पक्के करण्याच्या त्यांच्या मनसुब्यांना धक्का बसला आहे.
आरसीबीच्या पराभवामुळे पंजाब किंग्जला गुणतक्त्यात फायदा झाला आहे आणि त्यांनी आरसीबीला मागे टाकत दुसऱ्या स्थानावर पोहोचले आहे. गुजरात संघ १३ सामन्यांत १८ गुणांसह अव्वल स्थानावर आहे. पंजाब आणि आरसीबी दोघांचेही प्रत्येकी १७ गुण आहेत पण पंजाबचे दोन सामने शिल्लक आहेत तर आरसीबीचा ग्रुप स्टेजमध्ये फक्त एक सामना बाकी आहे. मुंबई इंडियन्सचा संघ १३ सामन्यांत १६ गुणांसह चौथ्या स्थानावर आहे.
लक्ष्याचा पाठलाग करताना कोहली आणि साॅल्टने आरसीबीला चांगली सुरुवात करून दिली. या दोन्ही फलंदाजांनी पॉवर प्लेपर्यंत सनरायझर्सना कोणतेही यश मिळू दिले नाही. सहा षटकांच्या अखेरीस आरसीबीने बिनबाद ७२ धावा केल्या. हर्ष दुबेने विराट कोहलीला बाद करून आरसीबीला पहिला धक्का दिला. कोहली चांगली फलंदाजी करत होता आणि अर्धशतक झळकवण्याच्या जवळ होता. २५ चेंडूत सात चौकार आणि एका षटकाराच्या मदतीने ४३ धावा काढल्यानंतर तो बाद झाला. कोहलीने सॉल्टसोबत पहिल्या विकेटसाठी ८० धावांची भागीदारी केली.
कोहली बाद झाल्यानंतरही सॉल्टने धावगतीचा वेग कमी होऊ दिला नाही. या मोठ्या लक्ष्याचा पाठलाग करताना, आरसीबीने आक्रमक फलंदाजी केली आणि नऊ षटकांत १०० धावांचा टप्पा ओलांडला. आरसीबीचा सलामीवीर फिल साॅल्टने २७ चेंडूत आपले अर्धशतक पूर्ण केले. या हंगामात सॉल्टचे हे तिसरे अर्धशतक आहे आणि विशेष म्हणजे, तिन्ही अर्धशतके लक्ष्याचा पाठलाग करताना झळकावली गेली आहेत. दरम्यान, नितीश रेड्डीने ११ धावांवर मयंक अग्रवालला बाद करून आरसीबीला दुसरे यश मिळवून दिले.
पॅट कमिन्सने फिल साॅल्टला बाद करून आरसीबीला तिसरा धक्का दिला. ३२ चेंडूत चार चौकार आणि पाच षटकारांसह ६२ धावा काढल्यानंतर सॉल्ट बाद झाला. येथून पुढे, आरसीबीचा डाव गडगडला आणि त्यांनी नियमित अंतराने विकेट गमावण्यास सुरुवात केली. आरसीबीने १५ षटकांत तीन गडी गमावून १६७ धावा केल्या होत्या. त्यावेळी त्यांना जिंकण्यासाठी ३० चेंडूत ६५ धावा करायच्या होत्या, पण सनरायझर्सच्या गोलंदाजांनी शानदार पुनरागमन केले. प्रथम रजत पाटीदार धावबाद झाला, नंतर इशान मलिंगाने शानदार गोलंदाजी केली आणि रोमारियो शेफर्डला त्याच्याच गोलंदाजीवर झेलबाद केले. शेफर्ड खाते न उघडताच बाद झाला.
यानंतर, जितेश शर्माच्या रूपाने आरसीबीला सहावा धक्का बसला. जितेश १५ चेंडूत २४ धावा करून बाद झाला. जितेशला जयदेव उनाडकटने झेलबाद केले. त्याच वेळी, इशान मलिंगाने टिम डेव्हिडला बाद करून सनरायझर्स हैदराबादला सातवे यश मिळवून दिले. त्यानंतर पॅट कमिन्सने भुवनेश्वर कुमार आणि कृणाल पंड्याला तंबूमध्ये पाठवले. कृणाल हिट विकेट बाद झाला. सनरायझर्सकडून कमिन्सने तीन तर मलिंगाने दोन विकेट घेतल्या. या दोघांव्यतिरिक्त जयदेव उनाडकट, हर्षल पटेल, हर्ष दुबे आणि नितीश कुमार रेड्डी यांनी प्रत्येकी एक विकेट घेतली.
त्याआधी, इशान किशनच्या शानदार फलंदाजीच्या जोरावर सनरायझर्स हैदराबादने आरसीबीसमोर मोठे लक्ष्य ठेवले. इशानने ४८ चेंडूत सात चौकार आणि पाच षटकारांसह नाबाद ९४ धावा केल्या. आरसीबीने नाणेफेक जिंकून प्रथम गोलंदाजी करण्याचा निर्णय घेतला पण अभिषेक शर्मा आणि ट्रॅव्हिस हेड या सलामी जोडीने पहिल्या विकेटसाठी ५४ धावांची भागीदारी करत त्यांना जलद सुरुवात दिली. १७ चेंडूत तीन चौकार आणि तीन षटकारांसह ३४ धावा करणाऱ्या अभिषेकला बाद करून लुंगी एनगिडीने ही भागीदारी भेदली.
यानंतर भुवनेश्वर कुमारने ट्रॅव्हिस हेडला तंबूमध्ये पाठवले ज्याने १० चेंडूत तीन चौकारांसह १७ धावा केल्या. यानंतर, हेनरिक क्लासेन आणि इशान किशन यांनी जबाबदारी स्वीकारली आणि तिसऱ्या विकेटसाठी ४८ धावांची भागीदारी केली. सुयश शर्माने क्लासेनला बाद करून ही भागीदारी भेदली, ज्याने १३ चेंडूत दोन चौकार आणि दोन षटकारांसह २४ धावा केल्या. यानंतर, अनिकेत वर्मा ईशानला पाठिंबा देण्यासाठी आला आणि त्याने स्फोटक फलंदाजी केली. अनिकेतने नऊ चेंडूत एका चौकार आणि तीन षटकारांसह २६ धावा काढल्यानंतर बाद झाला. या सामन्यात नितीश रेड्डी प्रभावित करू शकला नाही आणि चार धावा काढल्यानंतर रोमारियो शेफर्डने त्याला बाद केले. त्यानंतर शेफर्डने अभिनव मनोहरला बाद केले जो १२ धावा करून तंबूमध्ये परतला.
इशान खंबीर राहिला आणि त्याने सातत्याने मोठे फटके खेळत धावगती कमी होऊ दिली नाही. इशानच्या फलंदाजीच्या जोरावरच सनरायझर्सना २३० धावांचा टप्पा ओलांडता आला. पॅट कमिन्सने सहा चेंडूत एका षटकारासह १३ धावा काढत नाबाद राहिला. आरसीबीकडून शेफर्डने दोन, तर भुवनेश्वर, एनगिडी, सुयश आणि कृणालने प्रत्येकी एक विकेट घेतली.
Author: Team Ratnagiri Vartahar
Official Ratnagiri vartahar Media creators & RV News YouTube Channel.
