शिवजयंतीपूर्वी ‘छावा’चा जगभरात डंका; बॉक्स ऑफिसवर नवा विक्रम!
अभिनेता विकी कौशल आणि रश्मिका मंदाना यांच्या प्रमुख भूमिका असलेल्या ‘छावा’ या चित्रपटाने प्रदर्शनाच्या महिनाभरातच अभूतपूर्व यश मिळवत जागतिक पातळीवर नवा विक्रम रचला आहे. शिवजयंतीच्या एक दिवस आधीच या चित्रपटाने 750 कोटींचा टप्पा ओलांडत बॉक्स ऑफिसवर दमदार कमाई केली आहे.
विक्रमांचा किल्ला सर करत ‘छावा’चा दणका
लक्ष्मण उतेकर दिग्दर्शित ‘छावा’ हा चित्रपट छत्रपती संभाजी महाराज यांच्या जीवनावर आधारित आहे. शिवाजी सावंत यांच्या प्रसिद्ध कादंबरीवर बेतलेल्या या चित्रपटात विकी कौशलने छत्रपती संभाजी महाराजांची भूमिका साकारली आहे, तर रश्मिका मंदाना महाराणी येसुबाईंच्या भूमिकेत आहे. तसेच, अभिनेता अक्षय खन्ना औरंगजेबाच्या भूमिकेत दिसत आहे.
प्रदर्शनानंतर पाचव्या आठवड्यातही हा चित्रपट बॉक्स ऑफिसवर तग धरून आहे. सॅकनिल्कच्या अहवालानुसार, प्रदर्शनाच्या 30 दिवसांत ‘छावा’ने 750.5 कोटी रुपयांची कमाई केली होती, तर 31 व्या दिवशी भारतात 8 कोटींची भर पडली. यामुळे एकूण कमाई 758.5 कोटी रुपयांवर पोहोचली आहे.
थलायवाचा विक्रम मोडला!
या भव्य यशासह ‘छावा’ने दाक्षिणात्य सुपरस्टार रजनीकांत यांच्या ‘2.0’ या चित्रपटाचा विक्रम मोडला आहे. 2018 मध्ये प्रदर्शित झालेल्या ‘2.0’ने जागतिक स्तरावर 744.78 कोटींची कमाई केली होती, तर ‘छावा’ने हा आकडा ओलांडून जगभरातील सर्वाधिक कमाई करणाऱ्या दहाव्या चित्रपटाचा मान मिळवला आहे.
शिवजयंतीपूर्वीच ऐतिहासिक यश!
शिवजयंतीच्या पूर्वसंध्येला ‘छावा’चा हा विक्रम अधिकच विशेष ठरतो. छत्रपती संभाजी महाराजांच्या पराक्रमावर आधारित हा चित्रपट प्रेक्षकांच्या मनात ठसा उमटवण्यात यशस्वी ठरला आहे. प्रेक्षकांच्या प्रचंड प्रतिसादामुळे हा चित्रपट पुढील आठवड्यांतही दमदार कमाई करेल, अशी अपेक्षा व्यक्त केली जात आहे.
छत्रपती संभाजी महाराजांच्या जीवनगाथेला अभूतपूर्व प्रतिसाद मिळाल्याने ‘छावा’ हा चित्रपट भारतीय चित्रपटसृष्टीत एक नवा मैलाचा दगड ठरत आहे!
Author: Team Ratnagiri Vartahar
Official Ratnagiri vartahar Media creators & RV News YouTube Channel.
