प्रथम वर्धापन दिन सोहळा: तवसाळ ग्रामदैवत श्री महामाई सोनसाखळी मंदिराचा उत्सव जल्लोषात
तवसाळ, ता. गुहागर :
तवसाळ गाव पंचक्रोशीचे जागृत देवस्थान व ग्रामदैवत श्री महामाई सोनसाखळी देवीच्या नव्या मंदिराच्या प्रथम वर्धापन दिनानिमित्त चार दिवसीय धार्मिक महोत्सव मोठ्या उत्साहात व भक्तिमय वातावरणात संपन्न झाला. अरबी समुद्र आणि शास्त्री नदीच्या संगमाजवळ, डोंगर-दऱ्यांच्या कुशीत वसलेल्या या पवित्र स्थळी उभारण्यात आलेले भव्य-दिव्य मंदिर भाविकांचे श्रद्धास्थान बनले आहे.
नूतनीकरणानंतर उभारलेल्या मंदिराच्या कलशारोहणाच्या स्मरणार्थ आयोजित या उत्सवात विविध धार्मिक विधी, भजन, पूजन आणि महाप्रसाद यांचा समावेश होता.
शनिवार, १४ फेब्रुवारी रोजी सकाळी षोडशोपचार पूजा तर सायंकाळी देवीचे अलंकार पूजन (रूप लावणे) करण्यात आले. रात्री स्थानिक ग्रामस्थांच्या सुमधुर भजनांनी वातावरण भक्तिरसाने न्हाऊन निघाले.
रविवार, १५ फेब्रुवारी रोजी मुख्य वर्धापन दिन सोहळा पार पडला. दुपारी १ वाजता भव्य महाप्रसादाचे आयोजन करण्यात आले होते. रात्री ‘२० x २०’ भजनांचा जंगी सामना रंगला. कोकण व मुंबईतील नामवंत भजनी बुवा सुयश मुरारी काराणे (भांडुप) आणि गणेश मनोहर जांभळे (बांद्रा) यांनी डबलबारी भजन सादर करत भक्ती आणि कलेचा सुरेल संगम घडवला.
सोमवार, १६ फेब्रुवारी रोजी सत्यनारायणाची महापूजा आयोजित करण्यात आली. पालशेत, वेळणेश्वर आणि नरवण येथील भजन मंडळांनी देवीचा महिमा गात उपस्थितांना मंत्रमुग्ध केले.
मंदिराची गाभाऱ्यापासून घुमटापर्यंत आकर्षक सजावट व विद्युत रोषणाई गुरव परिवार, कर्दे यांच्या हस्ते करण्यात आली होती, ज्यामुळे मंदिर परिसर उजळून निघाला होता.
या सोहळ्याच्या यशस्वी आयोजनासाठी स्थानिक ग्रामस्थांचा सत्कार करण्यात आला. मुंबई, पुणे तसेच विविध भागांतून भाविक मोठ्या संख्येने उपस्थित राहिले. विशेषतः माहेरवाशिणींच्या उपस्थितीने उत्सवाला वेगळीच शोभा प्राप्त झाली.
मंगळवार, १७ फेब्रुवारी रोजी देवीला गार्हाणे घालून देवांच्या रूपांचे अवतरण करण्यात आले आणि मंगलमय वातावरणात प्रथम वर्धापन दिनाची सांगता झाली.
देवस्थान ट्रस्टचे अध्यक्ष श्री. मोहन यशवंत गडदे यांनी सर्व भाविक, सहकार्यकर्ते आणि ग्रामस्थांचे आभार मानत हा सोहळा भविष्यात अधिक भव्य करण्याचा संकल्प व्यक्त केला.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
