काजुर्ली खडपेवाडी ग्रामस्थांतर्फे महेश नाटेकर, सुचिता घाणेकर-गोताड यांचा सत्कार
आबलोली
गुहागर तालुक्यातील काजुर्ली खडपेवाडी ग्रामस्थांच्या वतीने नवनिर्वाचित जिल्हा परिषद पडवे गट सदस्य महेश नाटेकर आणि पंचायत समिती पाचेरी सडा गण सदस्य श्रीमती सुचिता घाणेकर-गोताड यांचा सत्कार करण्यात आला.
निवडणूक कालावधीत महेश नाटेकर यांनी वाडीतील ग्रामस्थांना भेटून रस्त्या संदर्भातल्या समस्या जाणून घेतल्या होत्या आणि त्या पूर्ण करण्याचे आश्वासन दिले होते. जिल्हा परिषद सदस्य म्हणून निवडून आल्यानंतर अभिनंदन करण्यासाठी वाडीच्या वतीने त्यांचा सत्कार करण्यात आला. महेश नाटेकर यांचा सत्कार वाडीतील ज्येष्ठ सदस्य प्रकाश पवार तर सुचिता घाणेकर-गोताड यांचा सत्कार सुहासिनी पवार यांच्या हस्ते शाल, श्रीफळ व पुष्पगुच्छ देऊन करण्यात आला. यावेळी व्यासपीठावर माजी पंचायत समिती सदस्य डॉक्टर आनंद जोशी, ज्येष्ठ शिवसैनिक विजय वैद्य, काजुर्ली गावचे उपसरपंच सुधाकर गोणबरे, युवा कार्यकर्ते विशाल गोताड, अजित जोशी आदी मान्यवर उपस्थित होते. ग्रामस्थांच्या वतीने अमोल पवार यांनी नादुरुस्त रस्ता, दूर अंतरावर असलेल्या विद्युत डीपी मुळे निर्माण होणाऱ्या समस्या यांविषयी माहिती दिली. डॉक्टर आनंद जोशी यांनी तोंडली पिलवली ते काजुर्ली खडपेवाडी यांना जोडणारा खाडीपूल, मान आडीवाडी खडपेवाडी मळेवाडी कुंभारमाळा ते पांढरी पायर यांना जोडणाऱ्या रस्त्या संदर्भात विचार मांडले.
सत्काराला उत्तर देताना महेश नाटेकर यांनी मानवाडी ते खडपे- तेलीवाडी यांना जोडणारा रस्ता आणि त्यातील कठीण चढ-उतार यावर्षी पावसाळ्यापूर्वी काढून रस्ता सुस्थितीत उपलब्ध करून देण्याचे आश्वासन दिले. वाडीतील मतदारांनी केलेल्या सहकार्याविषयी कृतज्ञता व्यक्त करताना आपण सदैव या वाडीच्या विकासासाठी बांधील राहू असे आश्वासन दिले. सुचिता घाणेकर- गोताड यांनीही वाडीतील ग्रामस्थांचे आभार मानतानाच होळीच्या शुभेच्छा दिल्या.
कार्यक्रमाचे सूत्रसंचालन व आभार प्रदर्शन प्रा.अमोल पवार यांनी केले. यावेळी विनायक पवार, प्रकाश पवार, रघुनाथ पवार, संतोष पवार, सुभाष पवार, प्रमोद पवार, यशवंत पवार, अजित जोशी यांसह वाडीतील स्थानिक व मुंबईतील ग्रामस्थ, महिला मंडळ उपस्थित होते.
Author: Sandesh Kadam
संदेश कदम, अबलोली. रत्नागिरी वार्ताहर. डिजिटल मिडिया गूहागर तालुका समन्वयक
