तळवली भेळेवाडीमध्ये रंगपंचमीच्या निमित्ताने प्रथमच जागतिक महिला दिन उत्साहात साजरा
तळवली (मंगेश जाधव)
गुहागर तालुक्यातील तळवली येथील भेळेवाडीमध्ये ग्रामदेवता आई श्री सुकाई देवी यांच्या पालखी सोहळ्याच्या पार्श्वभूमीवर रंगपंचमी आणि जागतिक महिला दिन मोठ्या उत्साहात साजरा करण्यात आला. वाडीतील ग्रामस्थांनी प्रथमच एकत्र येत हा उपक्रम आयोजित केला.
रंगपंचमीच्या निमित्ताने देवीची पालखी वाडीतील प्रत्येक घरी नेण्यात आली. त्यानंतर सायंकाळी पालखी मिरवणूक काढण्यात आली आणि पालखी नाचवत रंगांची उधळण करत रंगपंचमी साजरी करण्यात आली.
रात्री उशिरा वाडीतील तसेच उपस्थित महिलांचा सन्मान करण्यात आला. यावेळी महिलांचे कुटुंब व समाजातील महत्त्व, त्यांचा आदर व सन्मान राखण्याची गरज याविषयी मार्गदर्शनपर विचार मांडण्यात आले. महिलांसाठी विविध खेळांचे आयोजन करण्यात आले असून विजेत्यांना बक्षिसे देण्यात आली.
तसेच अंगणवाडी ते नववीपर्यंत शिक्षण घेणाऱ्या होतकरू विद्यार्थ्यांना शालेय साहित्य वाटप करण्यात आले. वाडीतील पदवीधर तसेच विविध क्षेत्रात कार्यरत असलेल्या तरुणांनी विद्यार्थ्यांशी संवाद साधत शिक्षणाचे महत्त्व पटवून दिले व त्यांना पुढील वाटचालीसाठी प्रोत्साहन दिले.
हा कार्यक्रम आनंदी व उत्साही वातावरणात पार पडला. कार्यक्रम यशस्वी होण्यासाठी भेळेवाडीतील ग्रामस्थ व महिला मंडळींनी मोलाचे सहकार्य केले.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
