गुहागर: बिअर बारमध्ये धक्का लागल्याच्या कारणावरून तुफान राडा; बांबू आणि दगडाने मारहाण, तिघांवर गुन्हा दाखल
पालशेतमधील हॉटेल ‘गारवा’बाहेर राडा; किरकोळ वादाचे रूपांतर हाणामारीत
गुहागर: पालशेत बाजारपेठ येथील ‘हॉटेल गारवा’ बिअर बारमध्ये धक्का लागल्याच्या किरकोळ कारणावरून एका ५२ वर्षीय व्यक्तीला दगड आणि बांबूने बेदम मारहाण केल्याची खळबळजनक घटना घडली आहे. या हल्ल्यात प्रमोद गोपाळ पालशेतकर हे गंभीर जखमी झाले असून, गुहागर पोलिसांनी तीन संशयितांविरुद्ध गुन्हा दाखल केला आहे.
नेमकी घटना काय?
मिळालेल्या माहितीनुसार, १० मार्च २०२६ रोजी सायंकाळी ४:३० च्या सुमारास फिर्यादी प्रमोद पालशेतकर आपल्या भाच्यासह हॉटेलमध्ये बसले होते. यावेळी संशयित आरोपी प्रेमनाथ अंकुश पटेकर याने त्यांना धक्का मारला आणि तिथूनच वादाला तोंड फुटले. आरोपीने शर्टाची कॉलर पकडून अर्वाच्च भाषेत शिवीगाळ करण्यास सुरुवात केली.
दगड आणि बांबूने जीवघेणा हल्ला
वाद टाळण्यासाठी फिर्यादी हॉटेलबाहेर आले असता, संशयित साहिल सीताराम पटेकर याने त्यांच्या दिशेने दगड फेकला. हा दगड डोक्याला लागल्याने पालशेतकर रक्तबंबाळ झाले. त्यानंतर प्रेमनाथ पटेकर याने बांबूने तर चिंतामणी गणू पटेकर याने अन्य साथीदारांसह त्यांना लाथाबुक्क्यांनी बेदम मारहाण केली. भांडणे सोडवण्यासाठी आलेल्या महिलांनाही आरोपींनी धक्काबुक्की केली.
भारतीय न्यायसंहितेनुसार गुन्हा नोंद
या प्रकरणी गुहागर पोलीस ठाण्यात रात्री ९:०० वाजता तक्रार दाखल करण्यात आली. पोलिसांनी आरोपींविरुद्ध भारतीय न्यायसंहिता (BNS) २०२३ च्या खालील कलमान्वये गुन्हा नोंदवला आहे:
* कलम ११८(१): गंभीर दुखापत करणे.
* कलम १२५(अ): जीव धोक्यात घालणारे कृत्य.
* कलम ११५(२), ३५२, ३५१(२) आणि ३(५).
पोलीस तपास: गुहागर पोलिसांनी गु.आर.नं. १४/२०२६ नुसार गुन्हा दाखल केला असून पुढील तपास सुरू आहे. या घटनेमुळे पालशेत परिसरात खळबळ उडाली आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
