कॉमनवेल्थ गेम्स २०२६ : भारताचा ‘गोल्डन डे’; बॉक्सिंगमध्ये ७ सुवर्णांसह १० पदकांची ऐतिहासिक कमाई
महिला बॉक्सरची सुवर्णमय कामगिरी; प्रीती पवार, जास्मीन, साक्षी, प्रिया, अरुंधती, सचिन सिवाच आणि अंकुश पंघाल यांची सुवर्ण झेप
ग्लासगो | प्रतिनिधी : कॉमनवेल्थ गेम्स २०२६ मध्ये भारतीय बॉक्सरांनी इतिहास रचत एका दिवसात तब्बल ७ सुवर्ण आणि ३ रौप्यपदकांची कमाई केली. भारतीय महिला बॉक्सरांनी विशेष दमदार कामगिरी करत सलग सुवर्णपदके जिंकून भारताच्या पदकतालिकेत मोठी भर घातली. या शानदार यशामुळे बॉक्सिंग स्पर्धेत भारताचा दबदबा पुन्हा एकदा सिद्ध झाला.
सर्वप्रथम प्रीती पवार हिने महिला ५४ किलो वजनी गटात स्कार्लेट सवाना डेलगाडोचा ५-० अशा एकतर्फी फरकाने पराभव करून भारताचे सुवर्णपदकाचे खाते उघडले. त्यानंतर जास्मीन लम्बोरिया हिने उत्तर आयर्लंडच्या अनुभवी मायकेला वॉल्शवर मात करत सुवर्णपदक पटकावले.
महिला ५१ किलो गटात साक्षी चौधरी हिने इंग्लंडच्या रुबी व्हाइटचा ५-० अशा एकमताने पराभव करत सुवर्णपदक जिंकले, तर महिला ६० किलो गटात प्रिया घंघास हिने कॅनडाच्या मारी-बथूल अल-अहमदियेहवर मात करून सुवर्णपदकावर नाव कोरले.
महिला गटात अरुंधती चौधरी हिने इंग्लंडच्या शँटेल रीडचा एकतर्फी पराभव करत भारतासाठी आणखी एक सुवर्णपदक जिंकले.
पुरुष गटात सचिन सिवाच याने अंतिम फेरीत नामिबियाच्या ट्रायअगेन मॉर्निंग न्देवेलोवर ३-२ अशा विभाजित निर्णयाने मात करत सुवर्णपदक पटकावले. त्यानंतर अंकुश पंघाल याने पुरुषांच्या ८० किलो गटात इंग्लंडच्या डिमेजी शिट्टूचा पराभव करून भारताचे सातवे सुवर्णपदक जिंकत दिवसाची सांगता सुवर्णमयी केली.
दरम्यान, ऑलिम्पिक कांस्यपदक विजेती लव्हलिना बोर्गोहेन हिला महिला ७५ किलो गटाच्या अंतिम सामन्यात ऑस्ट्रेलियाच्या प्रतिस्पर्ध्याकडून पराभव स्वीकारावा लागल्याने रौप्यपदकावर समाधान मानावे लागले.
याशिवाय, पुरुषांच्या ५५ किलो गटात जादूमणी सिंग मांडेंगबाम आणि ९० किलो गटात नरेंद्र बेरवाल यांनीही रौप्यपदके जिंकून भारताच्या पदकसंख्येत भर घातली.
भारताच्या बॉक्सरांची पदकांची यादी
🥇 सुवर्णपदक विजेते
– प्रीती पवार – महिला ५४ किलो
– जास्मीन लम्बोरिया – महिला ५७ किलो
– साक्षी चौधरी – महिला ५१ किलो
– प्रिया घंघास – महिला ६० किलो
– अरुंधती चौधरी – महिला गट
– सचिन सिवाच – पुरुष ६० किलो
– अंकुश पंघाल – पुरुष ८० किलो
🥈 रौप्यपदक विजेते
– जादूमणी सिंग मांडेंगबाम – पुरुष ५५ किलो
– लव्हलिना बोर्गोहेन – महिला ७५ किलो
– नरेंद्र बेरवाल – पुरुष ९० किलो
भारतीय बॉक्सरांच्या या ऐतिहासिक कामगिरीमुळे कॉमनवेल्थ गेम्स २०२६ मधील भारताचा पदकांचा आकडा आणखी भक्कम झाला असून, जागतिक स्तरावर भारतीय बॉक्सिंगची ताकद पुन्हा एकदा अधोरेखित झाली आहे.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
