*पावसाच्या सरींत रंगली वाटद-कवठेवाडी आदर्श शाळेची वर्षा सहल; खेळ, निसर्ग आणि अनुभवातून विद्यार्थ्यांचे आनंदी शिक्षण
*रत्नागिरी प्रतिनिधी :- निलेश रहाटे
रत्नागिरी : पावसाच्या रिमझिम सरी, हिरवाईने नटलेला कोकणचा निसर्ग आणि विद्यार्थ्यांचा उत्साह अशा प्रसन्न वातावरणात वाटद-कवठेवाडी शाळेची वर्षा सहल उत्साहात पार पडली. निसर्गाच्या सान्निध्यात विद्यार्थ्यांना आनंदासोबतच प्रत्यक्ष अनुभवातून शिकण्याची संधी या उपक्रमातून मिळाली.
वर्षा सहलीदरम्यान विद्यार्थ्यांनी कबड्डी, खो-खो आणि रस्सीखेच यांसारख्या पारंपरिक मैदानी खेळांचा मनसोक्त आनंद घेतला. पावसाच्या सरींत खेळताना विद्यार्थ्यांनी केलेली धमाल-मस्ती हा सहलीचा विशेष आकर्षणाचा भाग ठरला. या खेळांमधून विद्यार्थ्यांमध्ये संघभावना, नेतृत्वगुण, शारीरिक तंदुरुस्ती, सहकार्याची भावना आणि खिलाडूवृत्ती विकसित होण्यास मदत झाली.
या सहलीचे विशेष वैशिष्ट्य म्हणजे पालकांनीही उत्स्फूर्तपणे सहभाग घेतला. पालकांनी विद्यार्थ्यांसोबत विविध उपक्रम आणि खेळांमध्ये सहभागी होत सहलीचा आनंद द्विगुणित केला. विद्यार्थी, पालक आणि शिक्षक यांच्यातील सुसंवाद आणि आपलेपणा वाढविण्यासही या उपक्रमाची मदत झाली.
यावेळी सामाजिक कार्यकर्ते तथा प्रगतशील शेतकरी उदय दामाजी रहाटे, शाळेचे बालरक्षक श्री. विश्वनाथ शिर्के आणि पालक श्री. मारुती कुर्टे यांनी विद्यार्थ्यांशी संवाद साधत मार्गदर्शन केले. त्यांनी निसर्गाचे विविध पैलू, कोकणची वैशिष्ट्ये, येथील जीवनशैली, निसर्गसंपदा, शेतीचे महत्त्व तसेच शेतीतील विविध कामे याबाबत विद्यार्थ्यांना माहिती दिली. चर्चात्मक पद्धतीने विद्यार्थ्यांशी संवाद साधत त्यांच्या प्रश्नांना उत्तरे देण्यात आली.
निसर्ग, शेती आणि ग्रामीण जीवनशैली यांचा दैनंदिन जीवनाशी असलेला संबंध विद्यार्थ्यांना समजावून सांगण्यात आला. त्यामुळे पुस्तकातील अभ्यासाला प्रत्यक्ष अनुभवाची जोड मिळाली. पुस्तकी ज्ञानासोबतच परिसरातील निसर्ग आणि जीवनपद्धतीचा प्रत्यक्ष अनुभव विद्यार्थ्यांना घेता आला.
या उपक्रमाचे नियोजन रत्नागिरी तालुक्यातील गणपतीपुळे प्रभागाच्या शिक्षण विस्तार अधिकारी श्रीम. सविता तोटावार आणि वाटद केंद्राच्या केंद्रप्रमुख श्रीम. मीनाक्षी मोहिते यांच्या मार्गदर्शनाखाली करण्यात आले. शाळेचे मुख्याध्यापक माधव अंकलगे आणि शिक्षिका पूनम कुलकर्णी यांनी सहलीचे नियोजन व आयोजन केले.
या उपक्रमाच्या यशस्वीतेसाठी शाळा विकास समितीचे अध्यक्ष श्री. अप्पा धनावडे, शालेय व्यवस्थापन समितीच्या अध्यक्षा सौ. निकिता कुर्टे यांच्यासह पालक आणि ग्रामस्थांचे विशेष सहकार्य लाभले.
पावसाच्या सरींत निसर्गाचा आनंद, मैदानावर खेळांचा उत्साह आणि संवादातून मिळालेले ज्ञान यांची सुंदर सांगड घालत पार पडलेली ही वर्षा सहल विद्यार्थ्यांसाठी आनंददायी, ज्ञानवर्धक आणि अविस्मरणीय अनुभव ठरली. ‘निसर्गाच्या सान्निध्यातून आनंदी व अनुभवाधारित शिक्षण’ या संकल्पनेची प्रचिती या उपक्रमातून आली.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
