रत्नागिरी जिल्ह्यात एचपीव्ही लसीकरणासाठी तालुकास्तरीय शिबीरे; आठ दिवसात कृतीआराखडा तयार करण्याचे पालकमंत्र्यांचे आदेश
महिलांना कर्करोगापासून बचावासाठी लसीकरण मोहिमेचा आरंभ; मॅमोग्राफी व्हॅन आणि डायलिसिस युनिटसाठीही पुढाकार
बातमी:
रत्नागिरी : जिल्ह्यातील महिलांना कर्करोगापासून वाचवण्यासाठी एचपीव्ही (ह्युमन पॅपिलोमा व्हायरस) लसीकरणासाठी तालुकास्तरावर शिबीरे आयोजित करावीत आणि त्यासाठी आठ दिवसात रुपरेषा तयार करा, असे निर्देश राज्याचे पालकमंत्री डॉ. उदय सामंत यांनी दिले आहेत. जिल्हाधिकारी कार्यालयात झालेल्या बैठकीत त्यांनी हा महत्त्वपूर्ण निर्णय घेतला.
या बैठकीला जिल्हाधिकारी एम. देवेंदर सिंह, मुख्य कार्यकारी अधिकारी वैदेही रानडे, वैद्यकीय महाविद्यालयाचे अधिष्ठाता डॉ. जयप्रकाश रामानंद, जिल्हा शल्यचिकित्सक डॉ. भास्कर जगताप, निवासी उपजिल्हाधिकारी चंद्रकांत सूर्यवंशी, डॉ. समिधा गोरे, मुख्याधिकारी तुषार बाबर आदी उपस्थित होते.
डॉ. सामंत यांनी सांगितले की, 9 ते 14 वयोगटातील मुलींसाठी दोन डोस आणि 15 वर्षांवरील महिलांसाठी तीन डोस लसीकरण आवश्यक आहे. शिबीरे आयोजित करताना प्राथमिक शिक्षणाधिकाऱ्यांची मदत घेऊन विद्यार्थिनींची संख्या निश्चित करावी. यामधून महिलांची संख्या देखील स्पष्ट होईल.
याशिवाय, नगरपरिषदेने मल्टीस्पेशालिटी हॉस्पीटलसाठी डायलिसिस युनिट सुरू करण्यासाठी सुस्थितीतील गाळे आणि आवश्यक पाण्याची सुविधा द्यावी, असे निर्देश देण्यात आले. तसेच, रुग्णवाहिकेची सुविधा सुधारणेचे आदेश जिल्हा शल्य चिकित्सक आणि अधिष्ठाता यांना देण्यात आले आहेत.
जिल्ह्यासाठी मॅमोग्राफी व्हॅन खरेदी करण्याचे निर्देश
डॉ. सामंत यांनी ठाणे महापालिकेच्या धर्तीवर रत्नागिरी जिल्ह्यासाठी मॅमोग्राफी व्हॅन खरेदीचा प्रस्ताव तयार करण्याचे आदेश आरोग्य अधिकारी डॉ. अनिरुद्ध आठल्ये यांना दिले. अडीच कोटी रुपयांची औषधे आणि दोन कोटी रुपये खर्चून व्हॅन खरेदी केली जावी. या प्रस्तावासाठी सीईओ, आरोग्य अधिकारी, शल्य चिकित्सक आणि डॉ. गोरे यांनी एकत्रितपणे काम करावे, असेही त्यांनी स्पष्ट केले. सिंधुरत्न योजनेतून आरोग्य क्षेत्राला निधी मिळवण्यासाठी शासनाकडे शिफारस करण्याचे निर्देशही दिले.
#RatnagiriNews #HPVVaccine #CancerPrevention #UdaySamant #RatnagiriHealth #MamographyVan #DialysisUnit #WomensHealth #MaharashtraHealth #PublicHealthCampaign
Author: Team Ratnagiri Vartahar
Official Ratnagiri vartahar Media creators & RV News YouTube Channel.
