पालीच्या श्री लक्ष्मीपल्लीनाथ देवस्थानचा वार्षिक चैत्रोत्सव उत्साहात संपन्न
देशविदेशातील भाविकांची मोठ्या संख्येने उपस्थिती; धार्मिक आणि सांस्कृतिक कार्यक्रमांनी झाला सोहळा खुला
तळवली (मंगेश जाधव): संगमेश्वर तालुक्यातील पाली-पाथरट येथील ग्रामदैवत आणि कोकणातील प्रसिद्ध श्री लक्ष्मीपल्लीनाथ देवस्थानचा वार्षिक चैत्रोत्सव सोहळा नुकताच अत्यंत उत्साहात व धार्मिक वातावरणात पार पडला. या सोहळ्यासाठी राज्यासह देश-विदेशातील भाविकांनी मोठ्या संख्येने हजेरी लावली.
चैत्र शुद्ध एकादशी ते चैत्र वद्य प्रतिपदा म्हणजेच ८ ते १३ एप्रिल २०२५ या कालावधीत हा सोहळा संपन्न झाला. यंदा समस्त सुहास सरवटे (पुणे) यांनी उत्सवाची सेवा केली. उत्सव काळात वैयक्तिक पूजा, अभिषेक, लघुरुद्र, महारुद्र, यज्ञयागादी धार्मिक विधी तसेच आरती, मंत्रपुष्पांजली, पालखी प्रदक्षिणा, मंत्रजागर, भजन व सांस्कृतिक कार्यक्रम यांची रेलचेल होती.
सांस्कृतिक कार्यक्रमांत भ.प. अभय धंगरेकर यांचे कीर्तन, श्री लक्ष्मीनारायण भजन मंडळ हेदवी (बुवा निखिल व अभय ओक) यांचे भजन, श्रुती व स्वरा कुलकर्णी यांचे कथ्थक नृत्य, अनमय बापट, मधुरा आठल्ये, स्वरा कुलकर्णी, आदिती हर्षे यांचे गायन, ह.भ.प. विश्वनाथबुवा भाटे (उमरे, रत्नागिरी) यांचे लळीताचे कीर्तन, आणि श्री लक्ष्मीपल्लीनाथ नाट्यमंडळ, पाली निर्मित वसंत कानेटकर लिखित “प्रिय आईस” या दोन अंकी नाटकाचा प्रयोग रसिकांच्या विशेष पसंतीस उतरला.
उत्सवात गुरुराज सावंत, अनंत पालकर, प्रदीप घडशी, बबन काजरेकर, सुभाष गराटे, चंद्रकांत गुडेकर, विष्णू माईण, रोहित पांचाळ, अनिल धाडवे, चंद्रकांत धाडवे यांच्यासह पाली-पाथरटमधील ग्रामस्थ मोठ्या संख्येने सहभागी झाले.
तसेच, श्री लक्ष्मीपल्लीनाथ आणि श्री करंबेळदेव मंदिरांच्या जीर्णोद्धाराचा १४ वा वर्धापन दिन अनुक्रमे ३० एप्रिल आणि १ मे रोजी पार पडणार असून, या कार्यक्रमांचा लाभ घ्यावा, असे आवाहन देवस्थानचे अध्यक्ष संतोष नारायण सावंतदेसाई यांनी केले आहे.
हॅशटॅग्स:
#श्रीलक्ष्मीपल्लीनाथ #पालीचैत्रोत्सव #Chaitrotsav2025 #सांगमेश्वर #RatnagiriFestivals #कोकणसंस्कृती #ChaitraMahotsav #Laxmipallinath
Author: Team Ratnagiri Vartahar
Official Ratnagiri vartahar Media creators & RV News YouTube Channel.
