फरहानचे वादळी शतक; पाकिस्तानचा नामिबियावर १०२ धावांनी दणदणीत विजय
मुंबई (गुरुदत्त वाकदेकर) : आयसीसी पुरुष टी–२० विश्वचषक २०२६ मधील ३५ व्या सामन्यात गट ‘अ’ मध्ये पाकिस्तानने नामिबियावर १०२ धावांनी एकतर्फी वर्चस्व गाजवत सुपर–८ फेरीत दिमाखात प्रवेश केला. सिंहलीज स्पोर्ट्स क्लब मैदानावर रंगलेल्या या लढतीत पाकिस्तानने प्रथम फलंदाजी करत २० षटकांत ३ गडी गमावून १९९ धावांचा भक्कम डोंगर उभारला. प्रत्युत्तरात नामिबियाचा संघ १७.३ षटकांत केवळ ९७ धावांत गारद झाला.
पाकिस्तानच्या डावाचा निर्विवाद नायक ठरला सलामीवीर साहिबजादा फरहान. त्याने ५८ चेंडूंत ११ चौकार आणि ४ षटकारांच्या मदतीने नाबाद १०० धावांची झंझावाती खेळी साकारत सामना पूर्णतः पाकिस्तानच्या बाजूने झुकवला. त्याला शादाब खानने २२ चेंडूंत नाबाद ३६ धावांची आक्रमक साथ दिली. कर्णधार सलमान आघाने ३८ धावांची संयमी खेळी करत डावाला स्थैर्य दिले. सैम अय्यूब १४ धावा करून माघारी परतला, तर ख्वाजा नफे केवळ ५ धावांवर बाद झाला. अखेरच्या षटकांत फरहान–शादाब जोडीने वेग वाढवत संघाला १९९ धावांपर्यंत मजल मारून दिली.
२०० धावांच्या आव्हानात्मक लक्ष्याचा पाठलाग करताना नामिबियाची फलंदाजी सुरुवातीपासूनच दबावाखाली आली. उस्मान तारीक आणि शादाब खान यांच्या फिरकीच्या जाळ्यात नामिबियाचे फलंदाज पुरते अडकले. लॉरेन स्टीनकॅम्पने सर्वाधिक २३ धावा केल्या, तर अलेक्झांडर वोल्शेंकने २० धावांची झुंज दिली. मात्र अन्य फलंदाजांना टिकाव धरता आला नाही. नियमित अंतराने कोसळणाऱ्या विकेट्समुळे नामिबियाचा डाव पूर्णतः विस्कळीत झाला आणि संपूर्ण संघ ९७ धावांत गुंडाळला गेला.
पाकिस्तानकडून उस्मान तारीकने अचूक फिरकीच्या जोरावर ३.३ षटकांत १६ धावा देत ४ गडी बाद केले. शादाब खानने ४ षटकांत १९ धावांत ३ बळी घेत प्रभावी साथ दिली, तर मोहम्मद नवाजने १ गडी बाद केला. पाकिस्तानच्या गोलंदाजांनी अचूक मारा करत नामिबियाच्या फलंदाजीचा कणा मोडून काढला.
सामन्यात शतक झळकावणाऱ्या साहिबजादा फरहानला सामनावीर पुरस्काराने गौरवण्यात आले. या दणदणीत विजयासह पाकिस्तानने गटातील अव्वल स्थान अधिक मजबूत करत सुपर–८ फेरीत आत्मविश्वासाने प्रवेश केला आहे. नामिबियासाठी मात्र हा पराभव स्पर्धेतील वाटचाल संपवणारा ठरला.
Author: RV.Ratnagiri Office
रत्नागिरी वार्ताहर डिजिटल बातमी पत्र - एडिटर विभाग
