रत्नागिरी जिल्हा क्रीडा पुरस्कारासाठी अर्ज सादर करण्याचे आवाहन!

🏆 रत्नागिरी जिल्हा क्रीडा पुरस्कारासाठी अर्ज सादर करण्याचे आवाहन!

खेळाडू, मार्गदर्शक आणि क्रीडा सेवकांसाठी सुवर्णसंधी; 20 जुलै अंतिम मुदत

रत्नागिरी: जिल्हा क्रीडा अधिकारी कार्यालय, रत्नागिरीमार्फत उत्कृष्ट खेळाडू (पुरुष, महिला, दिव्यांग), गुणवत्तापूर्ण क्रीडा मार्गदर्शक आणि क्रीडा सेवक यांच्यासाठी जिल्हा क्रीडा पुरस्काराकरिता अर्ज मागवण्यात आले आहेत. सन 2022-23, 2023-24 आणि 2024-25 या तीन वर्षांच्या कामगिरीसाठी हे पुरस्कार दिले जाणार आहेत.

अर्ज सादर करण्याची प्रक्रिया आणि अंतिम मुदत

इच्छुक उमेदवारांनी अर्ज आणि आवश्यक माहितीचा संपूर्ण संच 20 जुलै 2025 पर्यंत जिल्हा क्रीडा अधिकारी, जिल्हा क्रीडा संकुल, बाफना मोटर्सजवळ, एम.आय.डी.सी., मिरजोळे येथे कार्यालयीन वेळेत सादर करावा, असे आवाहन जिल्हा क्रीडा अधिकारी विजय शिंदे यांनी केले आहे. मुदतीनंतर प्राप्त झालेले अर्ज विचारात घेतले जाणार नाहीत, असेही स्पष्ट करण्यात आले आहे.

पुरस्काराचे स्वरूप आणि निकष

या पुरस्कारामध्ये प्रमाणपत्र, स्मृतिचिन्ह आणि रोख 10 हजार रुपये यांचा समावेश आहे. खेळाडू (पुरुष व महिला), दिव्यांग खेळाडू (पुरुष किंवा महिला) आणि क्रीडा मार्गदर्शक पुरस्कारांसाठी संबंधित पुरस्कार वर्षातील 1 जुलै ते 30 जून पर्यंतची कामगिरी/कार्य विचारात घेतले जाईल.

समावेश असलेले खेळ

जिल्हा क्रीडा पुरस्कारासाठी खालील खेळांचा विचार केला जाईल:

धनुर्विद्या (आर्चरी), मैदानी क्रीडा स्पर्धा (अॅथलेटिक्स), बॅडमिंटन, बिलियर्ड्स अॅण्ड स्नूकर, कॅरम, बुद्धीबळ, सायकलिंग, तलवारबाजी (फेन्सिंग), गोल्फ, जिम्नॅस्टिक्स, अश्वारोहण (हॉर्स रायडिंग), लॉन टेनिस, मल्लखांब, नेमबाजी, स्केटिंग, स्क्वॅश, जलतरण (स्विमिंग, डायव्हिंग, वॉटरपोलो), टेबल टेनिस, ट्रायथलॉन, आट्यापाट्या, बास्केटबॉल, शरीरसौष्ठव (बॉडीबिल्डिंग), मुष्टीयुद्ध (बॉक्सिंग), क्रिकेट, फुटबॉल, हॅण्डबॉल, हॉकी, ज्युदो, कबड्डी, कयाकिंग/कॅनोईंग, खो-खो, भारोत्तोलन (पॉवरलिफ्टिंग), रोईंग, तायक्वांदो, व्हॉलीबॉल, वजन उचलणे (वेटलिफ्टिंग), कुस्ती (रेसलिंग), वुशू, यॉटींग, सॉफ्टबॉल, रग्बी, मॉडर्न पेंटॅथलॉन, बेसबॉल, स्पोर्ट क्लायम्बिंग.

गुणवंत खेळाडू पुरस्काराचे निकष:

या अंतर्गत एक महिला खेळाडू, एक पुरुष खेळाडू आणि एक दिव्यांग खेळाडू यांना पुरस्कार प्रदान केला जाईल.

* खेळाडूने पुरस्कार वर्षासह लगतपूर्व 5 वर्षांपैकी 2 वर्ष जिल्ह्याचे प्रतिनिधित्व केले असावे.

* मान्यताप्राप्त खेळांच्या राज्य/राष्ट्रीय अजिंक्यपद स्पर्धेतील तसेच शालेय व केंद्र शासनामार्फत आयोजित क्रीडा स्पर्धांमधील राष्ट्रीय स्तरावरील मागील 5 वर्षांतील कामगिरी विचारात घेतली जाईल. यापैकी उत्कृष्ट 3 वर्षांची कामगिरी निवडली जाईल.

* अर्ज विहित नमुन्यात आणि मुदतीत सादर करावा. स्पर्धांच्या मूळ प्रमाणपत्रांच्या साक्षांकित प्रती जोडाव्यात.

* अर्ज अधिकृत जिल्हा संघटनेमार्फत शिफारस करून सादर करणे आवश्यक आहे. अपवादात्मक परिस्थितीत खेळाडू वैयक्तिकरित्या अर्ज करू शकतील.

* अर्जदाराचे महाराष्ट्रात सलग 15 वर्षे वास्तव्य असावे.

दिव्यांग खेळाडूंसाठी क्रीडा स्पर्धा स्तर:

ज्युनिअर वर्ल्ड पॅरा अजिंक्यपद स्पर्धा, आशियाई पॅरा अजिंक्यपद स्पर्धा (कनिष्ठ गट), कॉमनवेल्थ पॅरा अजिंक्यपद स्पर्धा (कनिष्ठ गट), वरिष्ठ पॅरा राष्ट्रीय अजिंक्यपद स्पर्धा, कनिष्ठ पॅरा राष्ट्रीय अजिंक्यपद स्पर्धा / वरिष्ठ पॅरा राज्य अजिंक्यपद स्पर्धा, कनिष्ठ पॅरा राज्य अजिंक्यपद स्पर्धा, कनिष्ठ / वरिष्ठ पॅरा जिल्हा अजिंक्यपद स्पर्धा. आंतरराष्ट्रीय स्पर्धेत सहभागी खेळाडूस जिल्हा क्रीडा पुरस्कार थेट देण्यात येईल. (उदा. एशियन गेम्स, कॉमनवेल्थ गेम्स, जागतिक अजिंक्यपद क्रीडा स्पर्धा, जागतिक चषक क्रीडा स्पर्धा, यूथ ऑलिंपिक गेम्स इत्यादी.)

क्रीडा मार्गदर्शक पुरस्काराचे निकष:

* अर्जदाराचे महाराष्ट्रात सलग 15 वर्षे वास्तव्य असावे.

* क्रीडा मार्गदर्शक म्हणून महाराष्ट्रात सलग 10 वर्षे मार्गदर्शन केलेले असावे आणि वयाची 35 वर्षे पूर्ण केलेली असावीत.

* गुणांकनासाठी त्याच जिल्ह्यातील खेळाडूंची कामगिरी ग्राह्य धरली जाईल.

* एकदा जिल्हा पुरस्कार प्राप्त केलेली व्यक्ती पुन्हा त्याच खेळात किंवा प्रवर्गात अर्ज करण्यास पात्र नाही.

* नॅशनल गेम्स, वरिष्ठ राष्ट्रीय अजिंक्यपद स्पर्धेत प्रतिनिधित्व केलेला खेळाडू घडवणारा किंवा राज्य/जिल्हा अजिंक्यपद स्पर्धेत प्रथम तीन क्रमांकापर्यंत यश मिळवणारे किमान तीन खेळाडू घडवणारा मार्गदर्शक.

* गेल्या 10 वर्षांत किमान वरिष्ठ गटातील राज्य व राष्ट्रीय पदक विजेते तसेच कनिष्ठ शालेय, ग्रामीण व महिला (खेलो इंडिया) मधील राष्ट्रीय स्तरापर्यंतचे पदक विजेते खेळाडू तयार केलेले असावेत.

अधिक माहितीसाठी संपर्क

विहित नमुन्यातील अर्ज संघटनेमार्फत किंवा वैयक्तिकरित्या विहित मुदतीत सादर करणे आवश्यक आहे. अर्जदाराने मार्गदर्शन केलेल्या खेळाडूंचे/खेळाडूंचे विहित नमुन्यातील हमीपत्र अर्जासोबत स्वतंत्रपणे जोडावे. अधिक माहितीसाठी जिल्हा क्रीडा अधिकारी कार्यालयात दूरध्वनी क्रमांक 02352-222517 वर संपर्क साधावा.

#RatnagiriSportsAwards #JilhaKridaPuraskar #MaharashtraSports #खेळाडू #SportsGuide #DivyangSports #ApplyNow #LastDate20July #DistrictSportsOffice #RatnagiriNews #SportingExcellence #Khe

lRatnagiri #जिल्हाक्रीडासंकुल

Author: Team Ratnagiri Vartahar

Official Ratnagiri vartahar Media creators & RV News YouTube Channel.